張家輝效應

幾個禮拜前，張家輝一身「超大隻打鑊勁」肌肉首度曝光，大家無不嘖嘖稱奇，仲懷疑係咪photoshop傑作。

確認消息真偽後，究竟你知唔知道，呢個消息對成個社會影響有幾大？
就係呢個張家輝，足於顛覆全港市民對"Fitness"的定義。各位無不見證過他以往身材的變化，心想佢以前瘦到條柴都做到，我勤力少少又點會做唔到？

喺Gym房，有個新手問健身教練，想練到張家輝咁，要幾耐。教練答佢，impossible is nothing，然後繼續嘴角含笑賣力地sell堂。因為咁，夏日期間gym room超級多人，想搵部機練下都有排等。
沙灘上有幾個大隻仔走過，曬緊太陽的我隔離三個女人一個墟咁話，「車，都無腹肌，張家輝都有六舊啦。」

而我睇到的，係三個我覺得都幾fit嘅男仔，雖然腹肌唔係一舊舊，但唔肥，腰線仲係度，有胸肌，睇得出一定有玩尖。一聽完，再望下自己，我即刻想掟自己落海...唔係，係掟佢地，因為佢地都唔見得好⋯

本來批評風氣已經極為嚴重嘅社會，對fitness標準又再上升一級。

究竟幾時個benchmark係去到張家輝呢個level度？你無張家輝咁乾身，你就係唔fit？前排壹周影到巨聲大細孖去海灘嬉水玩樂，其中一句形容佢地身材就係「同張家輝就無得比喇⋯」乜大細孖係行大隻路線咩⋯

空穴來風必有因，由上年紅褲A&F軍團，去到眾多韓國肌肉男星賣弄身材，再到今年書展「翻版黃曉明」顧又銘除衫sell書，係呢一年，男生露嘅肉越多，著嘅布就越少⋯

o靚模？除咗係鴨仔面前露點爆喊話要自殺嗰位之外，新o靚模你邊個會有印象？我諗我仲記得舊年書展將對波放喺扶手電梯那位嘅。其他呢，um，千人一面，點分？

大勢所趨，男人露肉比女人更爆更有看頭己成事實；當然一大原因係自從A&F仔來港後，公然欣賞、談論、撫摸同幻想男性胴體呢回事係女性(同部份男性族群)已經合理化，面對住報章雜誌社交網站日日「肉體侵襲」，大家睇到嘅body越多，就越有心得，越容易分體型高下；亦導致社會對男人體型要求越來越高。

如果你本身係公認無胸肌無腹肌無手瓜嘅「N無人士」，先恭喜你；因為無人對你有期望，所以你繼續幸福快樂咁生活喇，然後擺出一副 I don't fxxxxxx care 嘅姿態！

「張家輝效應」影響最大的，首當其衝就係一班健身男。

「你有做尖？有無八舊腹肌先？」

「你個胸有無四十二吋？對手有無十七吋？陳偉霆都有喎！」

「你有食健身奶粉？唔叻嘈（Natural）喎，唔怪得你咁大隻啦！」

「喂我想減肥，可唔可以教我做尖？但我唔想要一舊舊肌肉，好核突囉，我要少少手少少胸得囉」（男仔問）

如果你係尖友，係面對一堆睇肉當食飯但從未入過尖房的男女朋友們，你願唔願意花時間解䆁，係物理學上Taxi陳根本無可能有42'胸17'手(頂籠38'/13.5')、唔係話你join gym hea玩兩野就會一身肌肉，而有無腹肌係睇你肥定瘦底，仲要睇你想幾努力節食同做cardio？奶粉亦只係營養補充品，唔係大力菜，更唔係illegal substances...解釋完，佢哋都瞓著啦！ 

What，你話張家輝六個月都練到輯相嘅效果？究竟你知唔知道佢幾大犠牲，花咗幾多功夫？你可唔可以六個月戒油鹽糖日日食雞唔食飯一星期要操六日，又跑步又練拳又舉鐵（前提係喺呢個已經唔係好比到energy你嘅diet下），影相前仲要一星期狂飲水然後一星期再脫水先可以令拍照效果好尐？仲未計，佢有專業教練跟喎！

更重要一點，有好多人唔知道，佢呢身肌肉係keep唔到呢個高峰水平得幾耐。如果佢仲會做尖 (我估拍完戲就算做尖應該都唔會有之前嘅密度)，就算飮食再節制，都好難去得返呢個level吧。而且，呢種訓練法對肝腎影響都好大，佢都有講過佢痾尿係有泡泡嘅！

靈格風話三個月可以學好外語；必瘦站話十四日瘦七磅，喺呢個只重視結果而又要求所有事都要極速見效嘅社會，六個月變張家輝被合理化；而大家嘅defense就係，「我唔做啫，肯下決心做實得㗎！」實情呢？做比我睇下？！

我就覺得，欣賞還欣賞，又唔駛一定要強逼自己變成另一個人去遷就社會嘅審美眼光。但更重要一點，如果你只係想做個花生友（美其名「肉體鑑賞家」），學識欣賞一下人哋嘅付出，喺你批評人地唔完美之前，明白人地都有落過苦功。而且，要達至完美境界，中間一定有經歷過未係完美嘅歲月呀！

Your name, your fate

 

你英文名係咩？你鐘唔鐘意你個名？

如果你係出身草根家庭，而你父母又唔係好識英文的話，先恭喜你；呢類五六七十後剛落嚟香港嘅父母多數都唔會幫自己仔女改英文名。亦即係話，就算你老豆改你個名做鄉土味極濃嘅中文名「三妹」，唔使驚！你至少有權利叫自己做Sammy，幻想自己係鄭秀文唱「螢光粉虹」，霎時間時代感重現，自豪感十足啦！（仲唱螢光粉虹其實有幾 in 呢…）
 

但係，好地地點解要改個英文名？我叫陳大文，唔可以叫 Tai Man 咩？
 

九成九係你英文老師叫你改的。
 

我唔知你地改英文名個陣有咩心態，但係畢竟呢個算係你人生中首個重要決定，當你認定一個英文名，要轉名就好難，因為就算你轉名人地只會keep住叫你個舊名！所以，呢個好可能跟你一世的名字，你會點樣抉擇？
 

大路少少叫Peter John Mary？或者小學程度真係唔識太多英文名。其實呢尐都無咩問題，易叫易讀，係將來同人打交道個陣比較難記得啫。（請問係邊位Peter Chan搵你？）
 

改個有深度的，又長又難讀嘅名好唔好？Elizabeth、Evangeline、Maximilian、Josephine？

你以為長英文名易辨認啲？我以前有一排叫Frederick，Facebook 被tag相嗰陣有人胡亂將我改成Fredwitch，我幾時變做女巫？！我有另一位朋友叫 Felicity，佢話近乎個個朋友都將佢個名讀做 Facility…

以部份香港人英文程度嚟講，改長嘅英文名會有三個下場：被讀錯、被改成簡稱，同被批鬥。（改個咁難嘅名，懶巴Q閉！）
 

當人被賦與自由，就係任意妄為之時；一大堆風馬牛不相及嘅英文名，喺呢個時候就漸露頭角。
 

我有朋友叫阿山，佢想改個有「山」字嘅英文名，於是俾左一堆我自創名我睇。Shanny？有尐怪。Zanice？幾型嘅。Shanty？你想住係貧民窟（Shanty Town）？
 

我在某快餐店見過兩個員工，一個叫Mind，一個叫Din （括住個中文「癲」字）。有趣有趣。
 

更加唔使提喺香港特別普及嘅生果名吧，Apple、Mango、Cherry等。係呢幾款熱門生果㗎喇，我都想聽下有人叫自己做Durian、Papaya、Pineapple...
 

疊字派，Gigi、Lulu、Mimi 通街都係。易讀易上口就算你啦，但係叫YuiYui，我真係接受唔到囉... 如果我係鬼佬，我會情不自禁咁將YuiYui 讀做…裕E裕E…
 

最後一類，係聽落覺得無問題但在外國人眼中non-sense的名字⋯但我們好像早已經接受了，反正有咩騎呢名未聽過丫。我可以列一堆例子。華人圈裡很普及，鬼佬聽到打晒突！
 

- 由Spring去到Summer Autumn Winter，再去到四季(Season)。

- 再嚟唔知有心定無意，刻意改字母成另一個字，叫Author (其實係咪想叫Arthur？定係佢心願係做作家？！）

- Edison/Lincoln (聽落合理，但明明兩個都係姓氏！）

- Zeus/Apollo (你當自己係邊個？！神都夠膽冒犯⋯）
 

小弟無意 challenge 大家喜歡的英文姓名，畢竟呢個係香港文化之一，而且由來以久，大家都咁做你自然唔覺得奇怪。不過，至少大部份外國人改名都係有「譜」的，好少會用自創字，其實情況就好比中文姓名上有尐單字係近乎唔會出現，例如你唔會改自己個仔叫「陳危險」或者「李要死」吧！用Zeus例子做比喻，如果你姓秦，你會唔會改自己個仔做「秦始皇」？至於Mimi 呢類名做花名還好，平日就留番你honey叫啦，返工打Email個陣自稱Mimi就咪啦！
 

倒返轉頭諗，如果英文老師無叫你改英文名，你會改嗎？呢件事值得反思。世界上近乎只有華人同亞洲人先會幫自己改英文名。撇除歐州語系而以非英語為主要語言嘅國家，日本係其中一個無改英文名文化嘅國家；Ayumi Kentaro Azusa等，全部係日文直譯過來，唔會出現你明明中文名叫「美玲」但又要叫自己做Jenny嘅情況。
 

呢個「為自己改英文名」嘅文化已經牽涉到Social Linguistic的硏究範疇，呢度先唔詳述。如果你只係一個普通嘅星斗市民想改個唔啜核decent得嚟又出得大場面唔係太普通但又想彰顯你獨特品味而又唔難讀（下刪一萬字）嘅名，我建議你去search下English Name Dictionary！再唔係，美玲咪Mei Ling囉，牛津字典每年都收納新字新詞（話時話，六月牛津字典update都有幾百個新字新詞，例如headfuck，解impressive experience！），話唔定你可以幫姓名字典出一分力！

新一代食神上位法

係呢個人人都係食神嘅年代，究竟近幾年我哋聽過幾多次似是而非嘅食評？

三色台節目好睇與否見人見智，劇集收視波動比較大，因為要視乎師奶口味。

而唯獨係飲食節目收視永遠都咁穩定，無他嘅，不論你搵食足幾十年嘅阿蘇，定係班餓到病態瘦弱嘅o靚模做節目，上碟嘅菜永遠包裝到美輪美奐，然後慢鏡掠過啲菜，再影住嘉賓們你一啖我一啖嘅食相，流露出幸福嘅眼神，同埋喪笑「哈哈哈哈哈哈哈哈哈哈哈哈」但無人知佢哋為咩而笑。

係你以為佢地有咩真知灼見嗰陣，well，「啲魚好鮮甜、又唔腥！」「啲魚蛋好爽脆、好彈牙！」

收貨？算係喇，上個世紀啲飲食節目都仲識用呢啲形容詞。

而家呢，「呢啲雞，食落呢⋯um⋯好鮮！um⋯好有口感，啲味道出曬嚟！」

What？佢肯um⋯，即係仲肯諗野，只係詞窮。

冷不防隔離個o靚模誇張失實口吻一句，「嘩，雞好有雞味呀！」

頓時全埸語塞，無人接到落去。唯一解決辦法係第二個o靚模講，「魚都好有魚味！」，然後大家又「哈哈哈哈哈哈」作結。

或者以前我會笑佢「雞有雞味」係廢話。

但前排被揭發牛丸無牛肉，Openrice 依然有一堆「牛肉味出曬嚟」嘅食評，我不禁懷疑：要成為新一代食神，寫食評個陣，最基本真係要先講 「X」有無「X」嘅味。

原來，o靚模們快我哋一步明呢個道理。

除此之外，要先去學一堆懶型嘅形容詞。

「咖啡好 fruity 得黎又有啲苦嘅 aftertaste，正！」

喂，係人都識講喇！你要陳豪上身先得，即係⋯

「um，我覺得呢杯咖啡好bright，個body都幾thick，入口感覺好rich！佢fruity得嚟係接近berry那種fruity，幾易入口，而徘徊係口中嗰種感覺 etc ......」

咁先係路嘛！

仲未夠？要 stand out from the crowd？

我再一次建議從「雞有雞味」著手。

牛丸無牛肉只有豬肉已成事實，倒不如逆潮流而行。

「條魚雖然無魚味，但係口感有蝦嘅爽脆同蟹嘅鮮甜，感覺好特別！」

「呢碗雞粥我食到魚香茄子嘅感覺！其實，入面有無雞唔太重要，最緊要好味！」
沈卓盈做左個最強示範：食咩都有薯片味！我睇好妳有潛質做新一代食神！

無錯，就係食出另一種食物嘅感覺。

以強國人嘅功力同覆蓋范圍，我相信你畢生總會遇到呢類「掛羊頭賣狗肉」嘅食物。（即係皮革牛奶，屎製臭豆腐、塑膠珍珠奶茶、農藥饅頭等等…）

到你能夠食出「三聚青胺」嘅感覺嗰陣，我相信你離食神不遠矣！

無題

人生中，總有些時候，在霎時英雄感作崇之下，你不惜捨己為人去幫助有需要 (或者根本無需要) 的人士。
事成了，你頭也不回，昂然闊步瀟酒離去。你一定是在幻想他有多感激你。

實情呢？

你好心想讓座給一個孕婦。她堅決拒絕。你再提出要讓座，她再拒絕。
然後你成為了整個車廂的焦點。
結果，你還是黯然離去，而那個位一直刁空著。

讓座給人還要受這種眼光。你幫人，別人領情嗎？

還是你搞錯了？其實她可能只是一個肥妹，不甘受辱？

在一個車廂以外的你回望過去，發現有一個老婆婆佔領了那個座位。
箇中的因由也許不用再探索吧，反正就是有人受益了。
你，總算是好心做了一件好事。