路姆西

近日路姆西熱潮席捲全城，人人都話要用路姆西怒擲 CY；IKEA 頓時出現搶購潮，二手市場升值以致淘寶賣家也加價，鋒頭一時無兩，連 CY 也要跟牠合照。於是，Facebook 又再一次被洗版，由全體民眾大喊「我想要/買唔到路姆西」去到轉載關於路姆西銷情和各大明星（包括自己）與其合照的新聞。

接下來很理所當然的，就是一大堆「又講路姆西你煩唔煩啲？」的洗版投訴，連一些 blogger 也要搶先發聲，覺得這些低俗諧音粗口有趣是幼稚的表現云云，根本不值多談。

大家還記得上月熱爆但現在已沒有人玩的 bitstrip 嗎？整個興衰循環是一樣的，就是「大眾狂熱迷戀」 -》「全城怒轟其煩厭」-》 「自然消失」。

香港人的習慣，就是把紅極一時的事情重覆又重覆的去炒作；有些還可以靠二次創作多騙大家幾天的注意力，但更多的就是無聲無色的埋葬在港人的善忘和貪新鮮底下。有內涵的東西，也許經得起時間考驗的；搞綽頭、本質空洞的，根本沒有空間讓大家深談，自然捱不了多久。

既然我們都明白這個興衰循環，又何苦要投訴大家「洗版」，更何必要把自己處於道德高地借刀殺人，駡大眾追隨熱潮是「不理性」、「羊群心理」和「幼稚」？港人的集性和風氣由來已久，也不是單憑一己之力可以改變到的；而這些茶餘飯後的話題，大家本來就沒有要想過來充撐大場面，與其為此動氣，還不如一笑置之。

老土點還是那一句，「放鬆啲啦，香港人。」

小弟大膽推測，下星期將會有一堆「又媽媽再打我一次，post 夠未？」的投訴，所以打鐵趁熱，先行二次創作一下。
 

酷愛林志美

某沉迷玩 Skout 的男同事，今日同我訴苦。

「其實我都知 skout 唔可以玩認真，不過今次我真係中咗伏。佢個樣係我鐘意好 sweet 嗰 type，而且佢上面都有幾張唔同角度嘅相，應該假極有個譜丫，所以就同佢 chat 吓。佢開頭都有少少吊高嚟賣，後來越傾越熟，覺得佢以靚女嚟講算係 talkative 同啱嘴型就約出嚟見。一見，嘩，比想像中肥好多，而且個樣同相中有啲分別⋯⋯唔係話完全唔似，但我無 expect 係咁樣！到最後我都同佢食咗飯，而佢真人性格真係唔錯，有禮貌同 make sense，唔港女嘅。但我始終都唔係好接受到個樣，唔係話樣衰⋯⋯即係我原本以為佢係林志玲，點知出到嚟原來係林志美，咁我可以點？」

我叫佢比張真人相我睇。根本唔樣衰⋯⋯.

「你自己都講，個人都算適合你，可以試下發展喎！我覺得佢個樣都 OK 丫！」

「問題係我 expectation 同現實有距離嘛，唔 gur 呀！」

我再叫佢比我睇 skout 入面啲相。一張帶超，一張有落 effect （仲要高抄變 V煞面)，一張瞓低影 (focus 喺條腿，又真係幾幼，我諗佢都瘦過⋯）Well，咁就話人係林志玲，你有無腦嫁？

「我未必會再約佢喇，不過如果佢主動提議我可以考慮下！」

呢位食慣味千拉麵嘅同事，有一次去食一蘭拉麵，之後同我講，佢始終覺得味千係最正嘅，唔明點解啲人要排長龍食一蘭！更加唔明點解啲人成日話「味精拉麵」難食！

所以，林志玲不屬於你的。

酷愛你的林志美吧，她適合你；

而且佢根本 唔 · 係 · 醜。

膠曲共賞：骨膠原

＜膠曲共賞：骨膠原＞

無錯，我就係那個太正經的怪人。

話說今期 100 毛講 Wyman 點樣捍衛佢以前作過嘅膠詞。因為佢行通俗路線，所以好多淺白、口語化嘅表達我都接受到；例如我完全撐佢用廣東話填＜你唔愛我啦＞，因為廣東話係正統讀得寫得嘅語言，當然可以用嚟填詞。

之但係，事隔多年我仍然接受唔到「骨膠原」呢三個字出現係歌詞入面。

「男人心一字馬」係真心膠；用抽象到外星人都唔銀明嘅比喻嚟形容男人一腳踏兩船，只能講係眼高手低。「骨膠原」係當年張智霖某專輯內嘅強勢主打，亦僅僅被擠出網上二零零九年十大膠歌排行榜（同期十大極膠作品包括古巨基＜周星呢＞同徐子珊＜血拚＞，都係萬年難得一遇嘅驚世鉅作）。骨膠原（又稱膠原蛋白）作為身體嘅組成部份，同血小板、紅血球同種類；亦近似人體會䆁放嘅賀爾蒙例如皮質醇、腎上腺素、睾丸酮等。

如果連「骨膠原，都失去了/消耗了」呢句歌詞都過到關，咁「皮質醇，都偏高了」、「紅血球，都減少了」或者「睾丸酮，都升爆了」（註：呢句同骨膠原都消耗了係完全啱音㗎！）都應該得啦！Well，我唔想唱 K 嗰陣都要對住尐內分泌呀大佬！唔係每個字同詞都可以用喺歌詞到㗎？！

如果未聽過首歌的，方便下大家俾埋 link 你！

其實首歌都 OK，我係頂唔順骨‧膠‧原‧三個字啫！

--------------------------------------------------------------------------------------------------------------------------
另外，好似呢類短文，其實小弟係 prefer 放 facebook page 的，不過為免個 blog 發霉同埋 in case 大家仲未知道我開左個 page（Scroll 去右上角你就見到條 link 喇！） ，都係照放呢度啦。

新一代食神上位法

係呢個人人都係食神嘅年代，究竟近幾年我哋聽過幾多次似是而非嘅食評？

三色台節目好睇與否見人見智，劇集收視波動比較大，因為要視乎師奶口味。

而唯獨係飲食節目收視永遠都咁穩定，無他嘅，不論你搵食足幾十年嘅阿蘇，定係班餓到病態瘦弱嘅o靚模做節目，上碟嘅菜永遠包裝到美輪美奐，然後慢鏡掠過啲菜，再影住嘉賓們你一啖我一啖嘅食相，流露出幸福嘅眼神，同埋喪笑「哈哈哈哈哈哈哈哈哈哈哈哈」但無人知佢哋為咩而笑。

係你以為佢地有咩真知灼見嗰陣，well，「啲魚好鮮甜、又唔腥！」「啲魚蛋好爽脆、好彈牙！」

收貨？算係喇，上個世紀啲飲食節目都仲識用呢啲形容詞。

而家呢，「呢啲雞，食落呢⋯um⋯好鮮！um⋯好有口感，啲味道出曬嚟！」

What？佢肯um⋯，即係仲肯諗野，只係詞窮。

冷不防隔離個o靚模誇張失實口吻一句，「嘩，雞好有雞味呀！」

頓時全埸語塞，無人接到落去。唯一解決辦法係第二個o靚模講，「魚都好有魚味！」，然後大家又「哈哈哈哈哈哈」作結。

或者以前我會笑佢「雞有雞味」係廢話。

但前排被揭發牛丸無牛肉，Openrice 依然有一堆「牛肉味出曬嚟」嘅食評，我不禁懷疑：要成為新一代食神，寫食評個陣，最基本真係要先講 「X」有無「X」嘅味。

原來，o靚模們快我哋一步明呢個道理。

除此之外，要先去學一堆懶型嘅形容詞。

「咖啡好 fruity 得黎又有啲苦嘅 aftertaste，正！」

喂，係人都識講喇！你要陳豪上身先得，即係⋯

「um，我覺得呢杯咖啡好bright，個body都幾thick，入口感覺好rich！佢fruity得嚟係接近berry那種fruity，幾易入口，而徘徊係口中嗰種感覺 etc ......」

咁先係路嘛！

仲未夠？要 stand out from the crowd？

我再一次建議從「雞有雞味」著手。

牛丸無牛肉只有豬肉已成事實，倒不如逆潮流而行。

「條魚雖然無魚味，但係口感有蝦嘅爽脆同蟹嘅鮮甜，感覺好特別！」

「呢碗雞粥我食到魚香茄子嘅感覺！其實，入面有無雞唔太重要，最緊要好味！」
沈卓盈做左個最強示範：食咩都有薯片味！我睇好妳有潛質做新一代食神！

無錯，就係食出另一種食物嘅感覺。

以強國人嘅功力同覆蓋范圍，我相信你畢生總會遇到呢類「掛羊頭賣狗肉」嘅食物。（即係皮革牛奶，屎製臭豆腐、塑膠珍珠奶茶、農藥饅頭等等…）

到你能夠食出「三聚青胺」嘅感覺嗰陣，我相信你離食神不遠矣！