-

-

2013年7月30日 星期二

八十後集體回憶:活躍於二千年初,賣樣為主的女歌星(上)

我係八十後。我細個嘅偶像係盧巧音,因為佢尐歌好型(梗係唔係講緊好心分手三角誌嗰一堆啦!) 雖然佢唱live真係好⋯「好」⋯聽⋯

年年樂壇都有新人加入,有幾個唱唱下上左位,好似 Eason 到而家仲唱緊;有幾個好似陳敏之咁就走去拍戲;但更多的,消失咗都冇人記得。
 
我作為一個八十後,都幾理解喺十幾歲嗰陣除咗打機打波同渴望溝女之外 ,最經常做嘅就係Download歌(仲要用BT) 嚟聽。陳奕迅、楊千嬅、陳慧琳呢類已建立咗地位嘅歌手嘅歌固然會聽,但係為左追求潮流,好多新晉歌手嘅歌都會聽!

每年總會有尐被重金打造嘅新人希望係樂壇上分一杯羹。當年勁歌金曲仍然有人睇、唱片業仍然興盛,只要你夠靚真係阿豬阿狗都可以出唱片!

小弟嚴選十大活躍於世紀初 - 亦只活躍於世紀初的(即係約 2000-2005年)香港樂壇的女歌星,重溫一下佢地當年嘅風采!重點係,當中有好多歌藝都真係一般過一般…

先講第一個,李蘢怡


 
李蘢怡 - 夜遊杜拜
 
不過奉勸各位,如果你係女仔,都係唔好一個人夜遊杜拜喇,新聞都有講喇,喺阿拉伯呢尐保守國家可能你不幸被侵犯後,去報警反而會判你有罪!小心小心!
 
不過講到爆,都唔夠李蘢怡 Crossover 李龍基爆!(老實講,個MV我都有尐睇唔落去…﹚

李蘢怡,李龍基 - 明天你是否依然教我
 
講起李蘢怡,當然要提經常一齊做宣傳嘅陳文媛啦!佢地仲合唱左一首當年都幾hit 嘅歌。
 
陳文媛,李籠怡 - 時光中飛舞
 
而陳小姐的代表作,可能只係得呢首。
 
陳文媛 - 順路
 
其實首歌真係好普通,佢歌聲就更普通…我覺得事隔多年,我對佢印象最深的,就係佢捲入陳冠希淫照風波度…(So sad)
 
下一個要介紹的,係李彩華 (原名李彩樺) 佢一出道引來好大回響,因為佢真係幾靚女,旋即成為萬千宅男的夢中情人…另一點,就係佢頭一首派台歌派得幾好,旋律易上口易唱,所以佢當時都幾紅!
 
李彩華 - 愛一個人原來不易  
 
有佳作,當然有騎呢作。我唔會話係劣作,因為我欣賞Wyman夠guts用廣東話作詞。本來想放MV片,不過YY concert 呢段好爆,更加可以聽到佢無係錄音室修飾過嘅聲,大家盡情欣賞吧! (建議先將音量調低,因為佢會怒叫囂)
 
李彩華 - 你唔愛我啦
 
聽聞佢都仲幾活躍下,而且仲係大陸玩埋「星跳水立方」轉行跳水!
 
最後送大家一張相,大家如果以後係forum見到有人post「李彩華小背心」相嗰陣,千祈唔好中計,因為click入去你極有可能見到呢張…

 
下一位,我相信係十位中,歌藝最差那位。佢係張燊悅。大家先欣賞佢當年比較hit的一首歌。
 
張燊悅 -上帝愛我
 
錄音室tune左都覺得走走地…
方樹樑作曲,傅珮嘉作詞,有呢個班底應該傅小姐自己唱番,比張小姐真係暴殮天物!
最奧妙的,係呢首歌出左一輪之後,唔知邊個神來之筆,竟然將呢首歌變做勵志歌!(環球可能都明白,呢首歌旋律咁好,無理由就咁摧毀於張小姐之手…)

環球群星 - 同步過冬

 
大家聽完live,佢一開口,驚為天人!佢右邊位丁菲飛小姐都好似嚇呆左完全跟唔到…
話就話同步過冬,但呢班人無論技術、唱法都有太大分野。Sorry 我唔覺得可以帶出團結嘅感覺囉…
 
至於講到而家係K房都仲有人唱嘅話,張小姐的確係有一首代表作!(好可惜係翻唱)
 
張燊悅余文樂 - 明知故犯
 
依然係聽到尐pitch不斷飄不斷飄不斷飄⋯
 
第五位,頭先出現過係同步過冬段片!佢就係黃伊汶。我相信唔使講,大家都知我要放邊首歌喇,因為實在太hit,到而家仍然係各大膠歌膠詞榜十大不二之選!
 
黃伊汶 - 戒男
 
係各位聽完,「心情仍然很爛」想一味鬧之前,不如聽下原版先!
 
Sugababes - Round Round
 
 
其實,係連編曲都無咩改過。我覺得黃小姐唱歌還可以的 (雖然handle呢類歌差少少),成為膠歌問題當然係出係D詞度喇!我節錄一小段等大家欣賞下。
 
 *心情仍然很爛 (誰仍然很爛)
 但仍覺燦爛
 情色無規限 就讓我去揀
 誰比誰的爛 面前女與男
 陳東蘭茜後面站著慢熱電燈膽 *
 
我到而家完全唔明呢段究意想講乜…
 
又唔好一味彈,黃小姐接到呢首歌著實係非戰之罪;佢當年同李克勤合唱過幾首歌,市場反應都唔錯!
 
李克勤,黃伊汶 - 來到今天
 
相信大家都要少少時間消化下尐片。
陪伴住我地成長嘅「只賣樣」女歌星,又點止呢五個?密切留意下半部!

 
 


2013年7月22日 星期一

張家輝效應



幾個禮拜前,張家輝一身「超大隻打鑊勁」肌肉首度曝光,大家無不嘖嘖稱奇,仲懷疑係咪photoshop傑作。
確認消息真偽後,究竟你知唔知道,呢個消息對成個社會影響有幾大?
就係呢個張家輝,足於顛覆全港市民對"Fitness"的定義。各位無不見證過他以往身材的變化,心想佢以前瘦到條柴都做到,我勤力少少又點會做唔到?

喺Gym房,有個新手問健身教練,想練到張家輝咁,要幾耐。教練答佢,impossible is nothing,然後繼續嘴角含笑賣力地sell堂。因為咁,夏日期間gym room超級多人,想搵部機練下都有排等。
沙灘上有幾個大隻仔走過,曬緊太陽的我隔離三個女人一個墟咁話,「車,都無腹肌,張家輝都有六舊啦。」
而我睇到的,係三個我覺得都幾fit嘅男仔,雖然腹肌唔係一舊舊,但唔肥,腰線仲係度,有胸肌,睇得出一定有玩尖。一聽完,再望下自己,我即刻想掟自己落海...唔係,係掟佢地,因為佢地都唔見得好⋯

本來批評風氣已經極為嚴重嘅社會,對fitness標準又再上升一級。
究竟幾時個benchmark係去到張家輝呢個level度?你無張家輝咁乾身,你就係唔fit?前排壹周影到巨聲大細孖去海灘嬉水玩樂,其中一句形容佢地身材就係「同張家輝就無得比喇⋯」乜大細孖係行大隻路線咩⋯

空穴來風必有因,由上年紅褲A&F軍團,去到眾多韓國肌肉男星賣弄身材,再到今年書展「翻版黃曉明」顧又銘除衫sell書,係呢一年,男生露嘅肉越多,著嘅布就越少⋯

o靚模?除咗係鴨仔面前露點爆喊話要自殺嗰位之外,新o靚模你邊個會有印象?我諗我仲記得舊年書展將對波放喺扶手電梯那位嘅。其他呢,um,千人一面,點分?

大勢所趨,男人露肉比女人更爆更有看頭己成事實;當然一大原因係自從A&F仔來港後,公然欣賞、談論、撫摸同幻想男性胴體呢回事係女性(同部份男性族群)已經合理化,面對住報章雜誌社交網站日日「肉體侵襲」,大家睇到嘅body越多,就越有心得,越容易分體型高下;亦導致社會對男人體型要求越來越高。

如果你本身係公認無胸肌無腹肌無手瓜嘅「N無人士」,先恭喜你;因為無人對你有期望,所以你繼續幸福快樂咁生活喇,然後擺出一副 I don't fxxxxxx care 嘅姿態!

「張家輝效應」影響最大的,首當其衝就係一班健身男。
「你有做尖?有無八舊腹肌先?」
「你個胸有無四十二吋?對手有無十七吋?陳偉霆都有喎!」
「你有食健身奶粉?唔叻嘈(Natural)喎,唔怪得你咁大隻啦!」
「喂我想減肥,可唔可以教我做尖?但我唔想要一舊舊肌肉,好核突囉,我要少少手少少胸得囉」(男仔問)

如果你係尖友,係面對一堆睇肉當食飯但從未入過尖房的男女朋友們,你願唔願意花時間解䆁,係物理學上Taxi陳根本無可能有42'胸17'手(頂籠38'/13.5')、唔係話你join gym hea玩兩野就會一身肌肉,而有無腹肌係睇你肥定瘦底,仲要睇你想幾努力節食同做cardio?奶粉亦只係營養補充品,唔係大力菜,更唔係illegal substances...解釋完,佢哋都瞓著啦! 

What,你話張家輝六個月都練到輯相嘅效果?究竟你知唔知道佢幾大犠牲,花咗幾多功夫?你可唔可以六個月戒油鹽糖日日食雞唔食飯一星期要操六日,又跑步又練拳又舉鐵(前提係喺呢個已經唔係好比到energy你嘅diet下),影相前仲要一星期狂飲水然後一星期再脫水先可以令拍照效果好尐?仲未計,佢有專業教練跟喎!

更重要一點,有好多人唔知道,佢呢身肌肉係keep唔到呢個高峰水平得幾耐。如果佢仲會做尖 (我估拍完戲就算做尖應該都唔會有之前嘅密度),就算飮食再節制,都好難去得返呢個level吧。而且,呢種訓練法對肝腎影響都好大,佢都有講過佢痾尿係有泡泡嘅!

靈格風話三個月可以學好外語;必瘦站話十四日瘦七磅,喺呢個只重視結果而又要求所有事都要極速見效嘅社會,六個月變張家輝被合理化;而大家嘅defense就係,「我唔做啫,肯下決心做實得㗎!」實情呢?做比我睇下?!

我就覺得,欣賞還欣賞,又唔駛一定要強逼自己變成另一個人去遷就社會嘅審美眼光。但更重要一點,如果你只係想做個花生友(美其名「肉體鑑賞家」),學識欣賞一下人哋嘅付出,喺你批評人地唔完美之前,明白人地都有落過苦功。而且,要達至完美境界,中間一定有經歷過未係完美嘅歲月呀!




2013年7月15日 星期一

Your name, your fate

 
你英文名係咩?你鐘唔鐘意你個名?

如果你係出身草根家庭,而你父母又唔係好識英文的話,先恭喜你;呢類五六七十後剛落嚟香港嘅父母多數都唔會幫自己仔女改英文名。亦即係話,就算你老豆改你個名做鄉土味極濃嘅中文名「三妹」,唔使驚!你至少有權利叫自己做Sammy,幻想自己係鄭秀文唱「螢光粉虹」,霎時間時代感重現,自豪感十足啦!(仲唱螢光粉虹其實有幾 in 呢…)
 
但係,好地地點解要改個英文名?我叫陳大文,唔可以叫 Tai Man 咩?
 
九成九係你英文老師叫你改的。
 
我唔知你地改英文名個陣有咩心態,但係畢竟呢個算係你人生中首個重要決定,當你認定一個英文名,要轉名就好難,因為就算你轉名人地只會keep住叫你個舊名!所以,呢個好可能跟你一世的名字,你會點樣抉擇?
 
大路少少叫Peter John Mary?或者小學程度真係唔識太多英文名。其實呢尐都無咩問題,易叫易讀,係將來同人打交道個陣比較難記得啫。(請問係邊位Peter Chan搵你?)
 
改個有深度的,又長又難讀嘅名好唔好?Elizabeth、Evangeline、Maximilian、Josephine?

你以為長英文名易辨認啲?我以前有一排叫Frederick,Facebook 被tag相嗰陣有人胡亂將我改成Fredwitch,我幾時變做女巫?!我有另一位朋友叫 Felicity,佢話近乎個個朋友都將佢個名讀做 Facility…

以部份香港人英文程度嚟講,改長嘅英文名會有三個下場:被讀錯、被改成簡稱,同被批鬥。(改個咁難嘅名,懶巴Q閉!)
 
當人被賦與自由,就係任意妄為之時;一大堆風馬牛不相及嘅英文名,喺呢個時候就漸露頭角。
 
我有朋友叫阿山,佢想改個有「山」字嘅英文名,於是俾左一堆我自創名我睇。Shanny?有尐怪。Zanice?幾型嘅。Shanty?你想住係貧民窟(Shanty Town)?
 
我在某快餐店見過兩個員工,一個叫Mind,一個叫Din (括住個中文「癲」字)。有趣有趣。
 
更加唔使提喺香港特別普及嘅生果名吧,Apple、Mango、Cherry等。係呢幾款熱門生果㗎喇,我都想聽下有人叫自己做Durian、Papaya、Pineapple...
 
疊字派,Gigi、Lulu、Mimi 通街都係。易讀易上口就算你啦,但係叫YuiYui,我真係接受唔到囉... 如果我係鬼佬,我會情不自禁咁將YuiYui 讀做…裕E裕E…
 
最後一類,係聽落覺得無問題但在外國人眼中non-sense的名字⋯但我們好像早已經接受了,反正有咩騎呢名未聽過丫。我可以列一堆例子。華人圈裡很普及,鬼佬聽到打晒突!
 
- 由Spring去到Summer Autumn Winter,再去到四季(Season)。
- 再嚟唔知有心定無意,刻意改字母成另一個字,叫Author (其實係咪想叫Arthur?定係佢心願係做作家?!)
- Edison/Lincoln (聽落合理,但明明兩個都係姓氏!)
- Zeus/Apollo (你當自己係邊個?!神都夠膽冒犯⋯)
 
小弟無意 challenge 大家喜歡的英文姓名,畢竟呢個係香港文化之一,而且由來以久,大家都咁做你自然唔覺得奇怪。不過,至少大部份外國人改名都係有「譜」的,好少會用自創字,其實情況就好比中文姓名上有尐單字係近乎唔會出現,例如你唔會改自己個仔叫「陳危險」或者「李要死」吧!用Zeus例子做比喻,如果你姓秦,你會唔會改自己個仔做「秦始皇」?至於Mimi 呢類名做花名還好,平日就留番你honey叫啦,返工打Email個陣自稱Mimi就咪啦!
 
倒返轉頭諗,如果英文老師無叫你改英文名,你會改嗎?呢件事值得反思。世界上近乎只有華人同亞洲人先會幫自己改英文名。撇除歐州語系而以非英語為主要語言嘅國家,日本係其中一個無改英文名文化嘅國家;Ayumi Kentaro Azusa等,全部係日文直譯過來,唔會出現你明明中文名叫「美玲」但又要叫自己做Jenny嘅情況。
 
呢個「為自己改英文名」嘅文化已經牽涉到Social Linguistic的硏究範疇,呢度先唔詳述。如果你只係一個普通嘅星斗市民想改個唔啜核decent得嚟又出得大場面唔係太普通但又想彰顯你獨特品味而又唔難讀(下刪一萬字)嘅名,我建議你去search下English Name Dictionary!再唔係,美玲咪Mei Ling囉,牛津字典每年都收納新字新詞(話時話,六月牛津字典update都有幾百個新字新詞,例如headfuck,解impressive experience!),話唔定你可以幫姓名字典出一分力!