路姆西

近日路姆西熱潮席捲全城，人人都話要用路姆西怒擲 CY；IKEA 頓時出現搶購潮，二手市場升值以致淘寶賣家也加價，鋒頭一時無兩，連 CY 也要跟牠合照。於是，Facebook 又再一次被洗版，由全體民眾大喊「我想要/買唔到路姆西」去到轉載關於路姆西銷情和各大明星（包括自己）與其合照的新聞。

接下來很理所當然的，就是一大堆「又講路姆西你煩唔煩啲？」的洗版投訴，連一些 blogger 也要搶先發聲，覺得這些低俗諧音粗口有趣是幼稚的表現云云，根本不值多談。

大家還記得上月熱爆但現在已沒有人玩的 bitstrip 嗎？整個興衰循環是一樣的，就是「大眾狂熱迷戀」 -》「全城怒轟其煩厭」-》 「自然消失」。

香港人的習慣，就是把紅極一時的事情重覆又重覆的去炒作；有些還可以靠二次創作多騙大家幾天的注意力，但更多的就是無聲無色的埋葬在港人的善忘和貪新鮮底下。有內涵的東西，也許經得起時間考驗的；搞綽頭、本質空洞的，根本沒有空間讓大家深談，自然捱不了多久。

既然我們都明白這個興衰循環，又何苦要投訴大家「洗版」，更何必要把自己處於道德高地借刀殺人，駡大眾追隨熱潮是「不理性」、「羊群心理」和「幼稚」？港人的集性和風氣由來已久，也不是單憑一己之力可以改變到的；而這些茶餘飯後的話題，大家本來就沒有要想過來充撐大場面，與其為此動氣，還不如一笑置之。

老土點還是那一句，「放鬆啲啦，香港人。」

小弟大膽推測，下星期將會有一堆「又媽媽再打我一次，post 夠未？」的投訴，所以打鐵趁熱，先行二次創作一下。
 

酷愛林志美

某沉迷玩 Skout 的男同事，今日同我訴苦。

「其實我都知 skout 唔可以玩認真，不過今次我真係中咗伏。佢個樣係我鐘意好 sweet 嗰 type，而且佢上面都有幾張唔同角度嘅相，應該假極有個譜丫，所以就同佢 chat 吓。佢開頭都有少少吊高嚟賣，後來越傾越熟，覺得佢以靚女嚟講算係 talkative 同啱嘴型就約出嚟見。一見，嘩，比想像中肥好多，而且個樣同相中有啲分別⋯⋯唔係話完全唔似，但我無 expect 係咁樣！到最後我都同佢食咗飯，而佢真人性格真係唔錯，有禮貌同 make sense，唔港女嘅。但我始終都唔係好接受到個樣，唔係話樣衰⋯⋯即係我原本以為佢係林志玲，點知出到嚟原來係林志美，咁我可以點？」

我叫佢比張真人相我睇。根本唔樣衰⋯⋯.

「你自己都講，個人都算適合你，可以試下發展喎！我覺得佢個樣都 OK 丫！」

「問題係我 expectation 同現實有距離嘛，唔 gur 呀！」

我再叫佢比我睇 skout 入面啲相。一張帶超，一張有落 effect （仲要高抄變 V煞面)，一張瞓低影 (focus 喺條腿，又真係幾幼，我諗佢都瘦過⋯）Well，咁就話人係林志玲，你有無腦嫁？

「我未必會再約佢喇，不過如果佢主動提議我可以考慮下！」

呢位食慣味千拉麵嘅同事，有一次去食一蘭拉麵，之後同我講，佢始終覺得味千係最正嘅，唔明點解啲人要排長龍食一蘭！更加唔明點解啲人成日話「味精拉麵」難食！

所以，林志玲不屬於你的。

酷愛你的林志美吧，她適合你；

而且佢根本 唔 · 係 · 醜。

跑步機上…的自high？

《跑步機上…的自high？》

唔知你有無留意，好多人都鐘意喺 Facebook post 圖中呢類跑步機戰績相，然後就會發一堆「雖然好辛苦，但係值得！」、「加油吧 Cathy （佢自己個名），繼續向目標進發！」等 caption。

但我作為讀者，我只係見到一大堆無辦法產生共鳴嘅數字，恕我感受唔到你背後嗰種熱血同激昂。人類係視覺動物，你 Facebook 放食物照可能會刺激到我地嘅味蕾；如果你做 gym 放張 show 肌或者 show 小蠻腰嘅相都叫做有肉睇，再唔係流曬汗chok樣自拍都叫做有個樣睇下，我地觀眾都起碼可以讚下你 fit 左靚左型左丫。（雖然可能唔係真心…）

之但係你比一堆數字我，想點？係咪要我搵返你之前尐記錄然後讚你，（陳芷菁今日 VIP mode）「嘩，你好犀利呀，跑 5K 比上次快左 30 秒喎！」？

除非你有一班好 conscious 你跑步機訓練跑步嘅朋友（其實…堅係練跑的係會跑街囉…），否則 capture 跑步機 screen 呢件事好好好好好好好間唔中 post 下還 OK，只係一堆數字仲要日復日咁 post，well，如果你只係想要 workout log 記錄進度，收埋寫啦。所有 blog 同 social network 都有得 set privacy 架。

 

膠曲共賞：骨膠原

＜膠曲共賞：骨膠原＞

無錯，我就係那個太正經的怪人。

話說今期 100 毛講 Wyman 點樣捍衛佢以前作過嘅膠詞。因為佢行通俗路線，所以好多淺白、口語化嘅表達我都接受到；例如我完全撐佢用廣東話填＜你唔愛我啦＞，因為廣東話係正統讀得寫得嘅語言，當然可以用嚟填詞。

之但係，事隔多年我仍然接受唔到「骨膠原」呢三個字出現係歌詞入面。

「男人心一字馬」係真心膠；用抽象到外星人都唔銀明嘅比喻嚟形容男人一腳踏兩船，只能講係眼高手低。「骨膠原」係當年張智霖某專輯內嘅強勢主打，亦僅僅被擠出網上二零零九年十大膠歌排行榜（同期十大極膠作品包括古巨基＜周星呢＞同徐子珊＜血拚＞，都係萬年難得一遇嘅驚世鉅作）。骨膠原（又稱膠原蛋白）作為身體嘅組成部份，同血小板、紅血球同種類；亦近似人體會䆁放嘅賀爾蒙例如皮質醇、腎上腺素、睾丸酮等。

如果連「骨膠原，都失去了/消耗了」呢句歌詞都過到關，咁「皮質醇，都偏高了」、「紅血球，都減少了」或者「睾丸酮，都升爆了」（註：呢句同骨膠原都消耗了係完全啱音㗎！）都應該得啦！Well，我唔想唱 K 嗰陣都要對住尐內分泌呀大佬！唔係每個字同詞都可以用喺歌詞到㗎？！

如果未聽過首歌的，方便下大家俾埋 link 你！

其實首歌都 OK，我係頂唔順骨‧膠‧原‧三個字啫！

--------------------------------------------------------------------------------------------------------------------------
另外，好似呢類短文，其實小弟係 prefer 放 facebook page 的，不過為免個 blog 發霉同埋 in case 大家仲未知道我開左個 page（Scroll 去右上角你就見到條 link 喇！） ，都係照放呢度啦。