-

-

2013年8月7日 星期三

八十後集體回憶:活躍於二千年初,賣樣為主的女歌星(續)

話說上集講左五位活躍於世紀初的女歌星,相信大家睇片搵返好多回憶之餘,耳仔某程度上都受到污染…(係我衰,專cap埋李籠怡X李龍基同張小姐尐片…)

今集,陸續有黎!
以下介紹呢一位,其實都活躍左好耐。不如睇下佢點樣入行先!



其實,我聽左好多次,都唔知張小姐同黃先生講緊咩,勁lur…
係咪清純到唔似真?無計啦,當年新人出道九成九要賣清純。呢個廣告,足以令到張栢芝一炮而紅。(相反,黃宗澤仲要等多幾年…)

佢第一首派台歌就已經掃左幾個台冠軍歌喇!

張栢芝 - 任何天氣


扎孖辮,純情得可以…
一直以來,張小姐都比人話鵝公喉唱歌難聽,我唔知係因為佢混血兒關係定生活習慣唔好啦,不過佢尐碟其實賣得幾好!

下一首,係小弟精選,應該係佢最好聽嘅歌!

張栢芝 - 不一樣的我


又係我衰,其實佢有個正式MV版拍得好好好好好(自己去Youtube search啦),偏偏我就cap呢個live版本…無計啦,睇下佢尐台風,我都唔知話佢投入好定high大咗好…

送多兩首俾大家,我覺得都唔錯,分別係電影《忘不了》主題曲同《星願》插曲。

張栢芝 - 忘了忘不了


張栢芝 - 星語心願  (Youtube 八十幾萬點擊率,真係無得唔cap)


往後日子,張小姐就係不斷拍戲拍戲拍戲,之後同霆鋒結婚再爆出陳冠希淫照事件…
話時話,佢同李彩華一樣,又走左去星跳水立方跳水…

接住落黎,就係呢一位。


喂,係咪連你都以為係鄭秀文?

出道就被冠以「翻版鄭秀文」之稱嘅趙頌茹,話就話出過四隻碟,之但係叫你講你識佢邊隻歌,我估大部份都只能講到一首…

趙頌茹 - 發奮


其實我想cap多段片,好可惜,除左「發奮」呢首三台冠軍歌之外,其他歌真係cap唔落手…
佢出道左兩年就引退喇(好精明的抉擇),仲同(當年係)壞孩子周永恒結埋婚添!

下一個,應該係十個中唱歌最好的;但因為佢都真係有幾分姿色,所以納入呢個list度。

小雪都算係少數睇得又唱得嘅歌手,小弟自問當年都幾鐘意佢,可惜紅歌不紅人…
初出道時最hit的歌,可能係呢首。

小雪 - 有你是榮幸


佢大大話話都出過五隻碟,而且好多歌都四四正正唱K必備,呢隻我諗都算係佢另一出名作品。

小雪 - 菩薩


如果真係要講唱K,我估八十後無人未點過呢首掛!

小雪、漢洋 - 其實我介意

 
話說同佢合唱那位林漢洋,而家做左陳蕊蕊 (即係勁出kai歌那個sing之天使柑桔)的經理人,而佢其實不時都帶唔同囡囡出席活動,逼佢地合唱「其實我介意」。(即係呢,我堅係唔識林生其他歌,難怪佢要一歌走天涯…)

小雪似乎有意復出,大家睇下仲有無機會聽佢唱歌吧!

下一個,犀利喇,日本音樂監製小室哲哉徒弟(btw,陳敏之都係佢徒弟…)


葉佩雯唱歌未必係最好聽嗰個(但同小雪兩個應該係呢十大list度算係超班…),但一定係十個女星中最有個性的!
如果要數first hit,繼「蘭桂坊的傾斜度」後,應該係呢首…

葉佩雯 - Boom Ba La (段片幾窒,慎入)


老實講,呢首歌到以家都仲洗緊我腦…(鬼咩,chorus咁易記,如果而家先出呢隻歌十成會比高登友二次創作推出2x 加快版、4x 加快版、掉轉版、無限狂loop版…)

下一首,又係好有個性,而且應該係大家對佢印象最深嘅歌!

葉佩雯 - 二人默劇


小弟才疏學淺,有無人可以話我知 oh isa de isa de 係咩意思呢?
整多首,同「二人默劇」一樣,都係佢老公Eric Kwok 監製的!

葉佩雯 - 好假的你


呢首歌,除左唱比你聽之外,我相信target audience 一定有佢份…

放學ICU好假的肥仔


可憐肥仔又被抽水…

雖然葉佩雯只係風光咗兩三年,不過嗰陣真係幾紅,到而家仲間唔中出返黎添!

好喇今集講住咁多先。

喂,又話有十個,我數來數去都係得九個嘅!你呃我!
無計啦,第十個真係好爆,我cap片cap到傻左,無得唔獨立寫一篇…仲有幾多個女生未講丫,我相信都呼之欲出喇,下集慢慢欣賞啦!

不如睇下honorable mention,僅僅被擦出十大的三位女星…

梁洛施 - 晚晚乖


十二歲入行,十六歲出碟,梁洛施係香港史上其中一位最小年紀出道嘅歌手。呢首歌當中一名句,「我想跟你壞,但我未曾壞」都真係幾膾炙人口!廿一歲就幫李澤楷生仔,人生經歷真係快我哋成倍!

彭海桐  - 好好想想你


其實彭小姐係一個幾全能嘅唱作歌手,雖然自己派台歌數量不多,但曾經為梁詠琪、彭羚等眾多歌手編曲同作曲!好可惜,佢後來被揭發使用內地學生簽證喺香港簽約唱片公司,亦即係黑工身份,需要被遣返內地⋯

何嘉莉 - 非份之想

 
如果講紅,何嘉莉其實比以上好多位都紅,而且唱歌真係唔差。不過計番時間,佢其實2000年就已經走下坡,被逼走去台灣發展都無補於事,黯然退出樂壇…

下星期推出埋最後一篇,不但有傳說中的「cap片cap不盡,春風吹又生」嘅第十位女星,仲有「bonus track」比大家!
---------------------------------------------------------------------------------------------------------------------------
感性分隔線

大家有時間可以望一望我上一篇blog文,(唔係十大女星上集呀!),有少少個人感受,睇完就算得架喇,呵呵

沒有留言:

張貼留言